देवभूमि उत्‍तराखण्‍ड तैं देखौं, उड़िक अनंत आगास सी..जगमोहन सिंह जयाड़ा "जिज्ञासू"

गढ़वाळि कवि छौं, गढ़वाळि कविता लिख्दु छौं अर उत्तराखण्ड कू समय समय फर भ्रमण कर्दु छौं। अथाह जिज्ञासा का कारण म्येरु कवि नौं "जिज्ञासू" छ।दर्द भरी दिल्ली म्येरु 12 मार्च, 1982 बिटि प्रवास छ। गढ़वाळि भाषा पिरेम म्येरा मन मा बस्युं छ। 1460 सी ज्यादा गढ़वाळि कवितौं कू मैंन पाड़ अर भाषा पिरेम मा सृजन कर्यालि। म्येरी मन इच्छा छ, जीवन का अंतिम दिन देवभूमि उत्तराखण्ड मा बितौं अर कुछ डाळि रोपिक यीं धर्ति सी जौं।

Wednesday, April 7, 2021

पहाड़

मन तैं सकून देन्दन,

जौंका चरण मा बग्दिन,

पवित्र धौळि गंगा-जमुना,

च्वंट्यौं मा चमक्कदु,

सुखिलु चमकिलु ह्युं।

बदन मा जौंका धारण कर्यां,

हरा भरा बण,

पीठ फर जौंका झूमदन,

बांज, बुरांश अर देवदार।

बाटौं फुंड हिटदा बट्वै,

पौन्दन प्रकृति कु प्यार,

द्यखदन डांडी-कांठी,

मन मा पैदा ह्वन्दु उलार।

मनखि ब्वल्दन,

बल जिंदगी पहाड़ ह्वेगि,

पर पहाड़ अति प्यारा,

यीं दुन्यां मा अति न्यारा।

जुगराजि रै पहाड़,

त्वेन बीर भड़ द्येखि ह्वला,

आपकु रैबार हम्तैं,

उत्तराखण्ड की जै ब्वला।

जगमोहन सिंह जयाड़ा जिज्ञासू

रचना: 1631

No comments:

म्येरु भुला स्वर्गीय भगवान सिंह जयाड़ा

अब नि मिलेण यी धर्ति मा, अब कख ह्वेलि दगड़्र्र्रया तू? भुला भगवान सिंह जयाड़ा 1 फरवरी, 2020 कु सऊदी अरब मा स्वर्गवासी ह्वेेे। या दु:खद खबर जब मैकु रात 8.40 फर रमेश सिंह जयाड़ा न मैकु दिनि त मैकु बज्रपात कु सी ऐसास ह्वेेे। बचपन बिटि विद्यार्थी जीवन दगड़ा बिति अर दिल्ली मा भि कुछ समय तक दगड़ा रयौं। आज भुला की भौत याद औन्दि पर सब भगवान का हात छ।