ब्वल्दन
माटु छ मनखि,
खुश
कतै नि होणु,
ह्वन्दा
खान्दा मनख्यौं द्येखि,
ज्युकड़ि
नि जळौणु।
मिल्दु
छ वथ्गा हि,
जथ्गा
जैकु भाग,
नि जळौणु
तुम्न,
अपणि
ज्युकड़ि मा आग।
द्वी
दिनै यीं जिंदगी तैं,
हैंसि
ख्यलिक बितावा,
मनखि
छौं हम,
मन मा
मनख्वात जगावा।
क्या
ल्हिजाण दगड़ा?
सब यखि
रै जान्दु,
जथ्गा
छ भाग मा,
मनखि
वथ्गा हि खान्दु।
माटु
छ बल मनखि,
या छ
सच्ची बात,
जान्दु
यीं दुन्यां बिटि,
भटगैक
खाली हात।
27/01/2021
जब क्वी
ब्वल्दु मनखि कु,
बल तू
ढुंगू छैं,
सुणदन
तब ढुंगा,
ह्वन्दा
छन भारी नाराज,
तब ब्वल्दन,
ढुंगा
मनख्यौं कु,
तुम
छैं ढुंगा,
अर दुमुख्या
मनखि।
सच मा
ढुंगा द्यब्ता छन,
मूर्ति
बणैक मंदिर मा,
पूजदन
मनखि,
घर कूड़ा
भि बणौंदन,
जख अपणु
जीवन बितौन्दन,
मण्डाण
मा ढुंगा बिछैक,
ऊंका
ऐंच द्यब्ता नचौन्दन।
ढुंगा
ब्वल्दन,
हम्न
पाड़ नि त्यागि,
तुम
मनखि यना छैं,
जख मिलि
गळ्खि,
वे मुल्क
देस भागी।
27/01/2021
ह्वन्दु
छ जब पाड़ मा,
हिंवाळि
कांठी,
सोना
चान्दी सी चमकदिन,
अति
स्वाणि लगदिन,
चौखम्बा, नन्दा घूंटी,पंचाचूली,
चौखम्बा
अर त्रिशूली।
पर्वतजन
सदा द्यखदन,
करदन
भलु ऐसास,
जब औन्दन
सूरज भगवान,
ऊंचि
हिंवाळि कांठ्यौं बिटि,
देवभूमि
उत्तराखण्ड लग्दि,
स्वर्ग
का समान।
अंध्यारु
मिटि जान्दु,
डांडी-कांठ्यौं
मा ऐ जान्दु घाम,
ल्यन्दन
मनखि सुबेर,
देवभूमि
का द्यब्तौं कु नाम।
शुरु
ह्वन्दु दिन,
करदन
मनखि अपणि धाण,
सूरज
भगवान चमकदन,
खुश
ह्वन्दु ज्यू पराण।
सूर्योदय
पाड़ मा,
लग्दु
अति प्यारु,
मुल्क
भि हमारु,
यीं
दुन्यां मा अति न्यारु।
27/02/2021
धौळ्यौं
कु जल्म छ ह्वयुं,
हिमालयी
ग्लेशियरों बिटि,
ब्वल्दन
जौंकु सदानीरा,
सागर
जथैं बग्दु जान्दिन,
टकरान्दिन
अपणा किनारों सी।
धौळ्यौं
का धोरा छन,
प्रसिद्ध
पंच प्रयाग,
जख ब्याखुनि
बग्त,
बजदन
शंख अर घाण्ड,
जगदन
झिलमिल द्यू।
धौळ्यौं
का धोरा बस्यां छन,
सैर
अर बजार,
जख बिटि
निकळ्दु छ,
प्रदूषित
पाणी,
गंदळि
कर्याल्यन धौळि,
हे! मनख्यौं तुम्न,
धौळ्यौं
की पवित्रता,
कतै
नि पछाणि।
आज आवाज
उठणि,
धौळ्यौं
तैं बचावा,
पबित्रता
खत्म न करा,
धौळ्यौं
तैं न सतावा।
27/01/2021
मन
तैं सकून देन्दन,
जौंका
चरण मा बग्दिन,
पवित्र
धौळि गंगा-जमुना,
च्वंट्यौं
मा चमक्कदु,
सुखिलु
चमकिलु ह्युं।
बदन
मा जौंका धारण कर्यां,
हरा
भरा बण,
पीठ
फर जौंका झूमदन,
बांज, बुरांश अर देवदार।
बाटौं
फुंड हिटदा बट्वै,
पौन्दन
प्रकृति कु प्यार,
द्यखदन
डांडी-कांठी,
मन
मा पैदा ह्वन्दु उलार।
मनखि
ब्वल्दन,
बल
जिंदगी पहाड़ ह्वेगि,
पर
पहाड़ अति प्यारा,
यीं
दुन्यां मा अति न्यारा।
जुगराजि
रै पहाड़,
त्वेन
बीर भड़ द्येखि ह्वला,
आपकु
रैबार हम्तैं,
उत्तराखण्ड
की जै ब्वला।
27/01/2021
बीस बरस कु ज्वान ह्वेगि,
ब्वला त सयाणु ह्वेगि,
बिकास भि होण लग्युं,
पैलु जनु अब नि रैगि।
कर्णप्रयाग तक रेल जाणी,
ऊद बगणु अलकनंदौ पाणी,
आल वैदर रोड भि बण्नि,
यनु ह्वलु कैन नि जाणी।
रोजगार की आस जगणि,
पर्यटन बिकास होणु,
जतन कन्ना ज्वान सब्बि,
उत्तराखण्ड खुश होणु।
द्यख्दु जावा क्या क्या
ह्वलु,
पर्यावरण भि बचौण पड़लु,
पाड़ घच्चोरी हरेक पाड़,
दु:खी ह्वेक ऊद भि रड़लु।
भाषा संस्कृति कायम
रौ,
उत्तराखण्डै ज्व छ पछाण,
बांज बुरांसा बण प्यारा,
जख बस्दु हमारु पराण।
ज्यु पराण सी प्यारु
छ,
हमारु रौंत्याळु उत्तराखण्ड,
श्रृंगार करा तन मन
सी,
होण न द्यवा ऊत्ताणदंड।
जगमोहन सिंह जयाड़ा
“जिज्ञासू”
13/11/2020
क्या दिन क्या रात,
बग्त की छ बात,
नाति बिळम्युं
मोबैल फर,
सुण्दु निछ बात।
स्मार्ट फोन चलौणु,
गीत कार्टून द्येखि,
भारी खुश होणु,
दादा द्येखि,
मुखड़ि छ लुकौणु ।
जबरि छंद औन्दु,
करदु नाति तैं
पुळ्याट,
ब्वल्दु ल्हौ चीज
मैकु,
मचौन्दु लराट ।
आंग्ळि घुमौन्दु
फोन फर,
पढ़दु छ किताब,
अंग्रेजी मा पुछ्दु
मैकु,
दी नि सक्दु जबाब ।
कख गै ऊ जमानु,
सुण्दा था टक्क
लगैक,
दादा जी की बात,
कथा सुणि दादा जी
सी,
कटदि थै ह्युंदै
रात ।
नाति भारी प्यारु
लग्दु,
क्या बतौण बात,
चक्कड़ीत भारी छ,
कन्दूड़ जान्दा हात
।
12/11/2020
