सल्ट भारी बीहड़ इलाकु थौ,
अर ऊंचा नीसा डांडा,
फैसला ह्वै,
जब भी क्वी बैठक होलि,
रणसिंगा बजैये जालु,
अंग्रेज बोल्दा था,
बल यू पहाड़ कू,
खतरनाक टेलीफोन छ......
पटवारी पेशगार तैं,
घूस देणु बंद करेगे,
अब ऊं तैं हर चीज,
मोल ल्हीक खाण पण्नि थै,
20 सितम्बर, 1930 कू,
नयेड़ नदी का छाला,
नरसिंग गिरी का बगड़ मा,
एस.डी.एम. हबीबुर्ररहमान कू,
पुलिस कैम्प लगि,
सैडु डंगूला गौं घेरेगि,
गौं मा जू मनखि था,
ऊं फर भारी मार पड़ि,
बचे सिंह जी का घर की,
कुड़कि करेगी,
पुलिसन खूब लूट पाट करि,
घोड़ा दौड़ेक फसलपात,
बरबाद करेगि......
खुमाड़, टुकनोली, चमकना,
जब खबर पौंछि,
रणसिंगा बजि,
कई सौ मनखि,
नयेड़ का छाला कठ्ठा ह्वैन,
फसल कु हर्जानु,
वसूल करेगे,
एस.डी.एम. मजबूर ह्वै,
वापस लौटिगे.....
मौलेखाळ मा सभा ह्वै,
फैसला करेगे,
अत्याचारु सी बचण का खातिर,
नेता गिरफ्तार होला,
ठेकेदार पान सिंह पटवाळ,
सबसि पैलि गिरफ्तार ह्वैन,
येका बाद खुमाड़ मा,
पुरुषोत्तम जी का यख,
बैठक कू आयोजन ह्वै,
तय करेगे जौंका खिलाफ,
वारंट जारी होयां छन,
अपणि गिरफ्तारी देला,
लक्ष्मण सिंह अधिकारी जिन,
आंदोलन कू संचालन करि....
30 नवम्बर, 1930 कू,
मोहान डाक बंगला फर,
सत्याग्रहियौं कू जत्था पौंछि,
डंडा की बरसात ह्वै,
सब्बि जेल मा कैद करेग्यन....
सिलसिला जारी रै,
चार पांच सिंतम्बर, 1942 कू,
खुमाड़ मा भारी भीड़ जमा ह्वै,
गोबिन्द सिंह ध्यानी जिन,
पुलिस अर एस.डी.एम. कू,
बाटु रोकिक विरोध करि,
जानसनन गोळी चलाई,
गंगाराम अर खिमानंद कांडपाल,
चूड़ामणि अर बहादुर सिंह मेहरा,
शहीद ह्वैन, कुछ लोग घायल ह्वैन,
सल्ट की बहादुरी देखिक,
महात्मा गांधी जिन,
कुमाऊं की बारदोली की,
पदवी प्रदान करि........
-जगमोहन सिंह जयाड़ा जिज्ञासु,
सर्वाधिकार सुरक्षति,
दिनांक 30'.2015
