लड़ि भिड़िक लिनि थौ जू,
हातु सी छुटदु जाणु छ......
बित्याँ बीस सालु बिटि,
बत्तीस लाख उत्तराखंडी,
पलायन करि-करिक,
रोजगार की तलाश मा,
देश का महानगरू जथैं,
अपणि ज्वानि दगड़ा ल्हीक,
बग्दा पाणी की तरौं,
कुजाणि क्यौकु सुरक-सुरक,
प्यारा उत्तराखण्ड त्यागि,
आस अर औलाद समेत,
कूड़ी पुंगड़ि पाटळि छोड़ि,
कूड़ौं फर द्वार ताळा लगैक,
कुल द्यब्तौं सी दूर देश,
नर्क रूपी नौकरी कन्नौ,
दूर भाग्दु जाणु छ,
बलिदानु का बाद बण्युं,
प्यारु उत्तराखण्ड राज्य,
हातु सी छुटदु जाणु छ.....
आंकडों का अनुसार बल,
राज्य विधान सभा मा,
पलायन की परिणति का कारण,
पहाड़ की आठ घट्दि सीट,
घट्दु पहाड़ कू प्रतिनिधित्व,
हम्तैं यनु बताणु छ,
लड़ि भिड़िक लिनि थौ जू,
हातु सी छुटदु जाणु छ......
खान्दि बग्त टोटग उताणि,
मति देखा मरदु जाणी,
बिंगि ल्यवा हे!लठ्याळौं,
छौन्दा कू भि होयिं गाणि,
अब नि जावा घौर छोड़ि,
जख छोया ढ़ुंग्यौं कू पाणी,
समळि जावा अजौं भी,
बग्त यू बताणु छ,
लड़ि भिड़िक लिनि थौ जू,
हातु सी छुटदु जाणु छ......
जगमोहन सिंह जयाड़ा 'जिज्ञासू'
ग्राम: बागी नौसा, पट्टी. चन्द्रबदनी,
टेहरी गढ़वाल-२४९१२२
2.3.2009 को रचित
दूरभाष: 9654972366
