भाषा रुपी डाळि.....

भाषा रुपी डाळि का दगड़्यौं,

पुराणा पात झड़ि जाला,

फललि फूललि भाषा हमारी,

पात नयां चार चांद लगाला.......

 

पित्रुन रचि होलि भाषा हमारी,

गढ़वाळि, कुमाऊंनी, जौनसारी,

नयीं पीढ़ी तैं बोलणु सिखावा,

लिखण मा क्‍या छ लाचारी......

जब तक लिख्‍ला बोलला हम,

तब तक हि छौं उत्‍तराखण्‍डी,

ध्‍यान रखा बिना  भाषा कू,

मनखि जनु थौ शिखन्‍डी......

भाषा हमारी कथ्‍गा प्‍यारी,

कलम ऊठैक श्रृंगार करा,

मन सी सोचा हे लठ्याळौं,

जतन करि रसधार भरा.......

 

जल्‍म हमारु यीं धरती मा,

भाषा रुपी डाळि का,

श्रृंगार का खातिर होयुं छ,

भाषा अपणि त्‍यागि मनखि,

बिमुख ह्वै किलै खोयुं  छ........

 

                    13.10.2015

प्‍यारा पहाड़ सी प्‍यार करा.........

 

द्वार ढ़क्‍यां छन ताळा लग्‍यां,

धूर्पळा टूटिक भ्‍वीं मा ऐग्‍यन,

जौं कूड़ौं फर बचपन बिति,

बिन मनख्‍यौं का ऊदास ह्वैग्‍यन....

 

तिबारी डिंडाळ्यौं का खम्‍ब टूटिग्‍यन,

चौक मा फोळीं पठाळि,

बिन मनखि बिन गोरु का चौक,

रिटण लगिं छ बिराळि.......

अपणा बिकास खातिर छोड़़ी,

सब्‍यौंन अपणु प्‍यारु गौं,

कथ्‍गौंन कूड़ी पुंगड़ि बेच्‍यालि,

लेन्‍दा नि अब वख जाण कू नौं.....

लड़ि भिड़ि उत्‍तराखण्‍ड लिनि थौ,

हातु सी छुटदु जाणु छ,

मोळ माटु होण न देवा,

बग्‍त आज चेताणु छ..........

स्‍वर्ग सी सुन्‍दर मुल्‍क हमारु,

जख छन झप्‍पन्‍याळा बांज बुरांस,

हैस्‍दिं डांडी कांठी छन जख,

डाळ्यौं मा बास्‍दि घुघति हिल्‍वांस......

प्‍यारा पहाड़ तैं न त्‍यागा,

हमारा पहाड़ मा सब्‍बि धाणी,

कखन देखल्या रौंत्‍याळि डांडी,

चुकलु पहाड़ कू ठंडु पाणी......

 

पहाड़ जवा अर कूड़ी लिपिक,

घर कूड़ी कू श्रृंगार करा,

ताळा खोला घर कूड़यौं का,

प्‍यारा पहाड़ सी प्‍यार करा.........

 

               13.10.2015

कवि नजर....

 

घर बिटि ड्यूटी जाण लग्‍युं थौ,

देखि दुकान दुकान मा बांद खड़ी,

जुन्‍याळि रात की जोन सी थै वा,

कवि नजर वीं फर पड़ी......

आंखा चक्‍क बक्‍क ह्वैन मेरा,

ड्यूटी जाण कू ज्‍यु नि करि,

लौटिग्‍यौं तब मैं घर कू अपणा,

कलम ऊठैक रचना करि.....

रुप की वा धनवान थै भारी,

दिन का ऊजाळा मा चमकणि थै,

नाक मा नथुलि बुलाक वींका,

हलहल हलहल हलकणि थै.....

ज्‍वानि का दिन होन्‍दा मेरा,

घर बौड़िक कतै नि औन्‍दु,

सौदा पत्‍ता कन्‍न का बाना,

वीं दगड़ि मैं माया लगौन्‍दु.....

घरवाळि मैंकु पूछण लगिं थै,

आज किलै लौटिक अयां,

बात यनि क्‍या ह्वैगि आज,

क्‍यौकु ड्यूटी फर नि गयां....

मैंन बताई ध्‍यान सी सुण तू,

दिल मा आज ऊजाळु ह्वैगि,

ज्‍युकड़ि का द्वार खुलिग्‍यन मेरा,

पापी मन मेरु भरमैगि......

आज देखि मैंन बांद एक,

दिन का ऊजाळा मा चमकणि थै,

गोरी गलोड़ि देखि वींकी,

नजर मेरी नि हटणि थै.....

 

घरवाळि बोन्‍नि नजर तुमारी,

 मैं फर भी वे दिन पड़ि थै,

शर्म सी लगणि थै मैकु भारी,

दगड़्या मेरी मैं दगड़ि खड़ि थै......

10.10.2015

धन बे दिल्‍ली.....

धन बे दिल्‍ली त्‍वे दिल्‍ली मा,

कथ्‍गा मनखि समौणा,

गढ़वाळि दनकिक ऐग्‍यन दिल्‍ली ,

अपणु दर्द दबौणा.....

जैं भी कलोनी मा,

दिल्‍ली मा जावा,

दिखेन्दा छन गढ़वाळि,

घर घर जख्‍या कु तड़का लग्‍दु,

बणौन्‍दा पकोड़ी स्‍वाळि......

वे गढ़वाळ की रौनक हर्चिगी,

दिल्‍ली मा सदानि बग्‍वाळि,

कैका मन मा दर्द बस्‍युं छ,

खुश छन कुछ गढ़वाळि......

कूड़ी बंजेगि कंडाळि जमिगि,

पुंगड़ि पड़िग्‍यन बांजा,

कुछ का मन मा दर्द कतै नि,

बणिग्‍यन दिल्‍ली मा राजा.....

संस्‍कृति कू त्‍याग करिक,

होण लग्‍युं मोळ माटु,

अपणा गढ़वाळ तैं याद नि करदा,

खोज्‍दा नि गौं कु बाटु......

घड्याळा लगणा भूत पुजेणा,

पित्र भी यखि थर्पेणा,

दिल्‍ली भारी स्‍वाणि लगणि,

देब्‍ता भि यखि नचेणा....

दिल्‍ली भलि छ लगणि भारी,

धन बे दिल्‍ली त्‍वेकु,

दिल वाळौं दिल्‍ली छैं तू,

क्‍या कसूर छ कैकु.......

- जगमोहन सिंह जयाड़ा जिज्ञासु

सर्वाधिकार सुरक्षित अर प्रकाशित

दिनांक 21.6.. 2015

कळजुगि ब्‍वारि.....

 

सासू बणि छ न्‍युं च्‍युं, ब्‍वारि बणि थाणेदार,

काम कतै नि करदि वा, सुण्‍दि कुछ नि हपार....

मोबाईल वींकु नेट धारी, फेसबुक की रोगि बणि,

रात दिन झुकिं छ चैट फर, निंद नि औन्‍दि वी सणि....

रात भर वा सेन्‍दि निछ, दिन मा होयिं लमतम,

धाणि कू बोला चिरड़ेन्‍दि छ, गुस्‍सा औन्‍दु वी धम्‍म...

 

पैर्वाक सी पंजाबी बणि छ, करवाचौथ मनौन्‍दि छ,

गढ़वावाळि नि बोल्‍दि वा, हिन्‍दी मा छ्वीं लगौन्‍दि छ....

गौं का बण फुंड जब वा, घास काटण जान्‍दि छ,

भेळ ऐंच बैठिक वा, फेसबुक मा ख्‍वै जान्‍दि छ....

पहाड़ बांजा पड़िगि आज, हे कनु जमानु ऐगि,

यनि कळजुगि ब्‍वारियौं की कृपा सी, मोळ माटु ह्वैगि....

सासु बोन्‍नि छ हे नौना, यीं ब्‍वारि तू दगड़ा ल्‍हिजा,

भारी कळजुगि ब्‍वारि छ या, मैकु छुटकारु दीजा.......

 

20.10.2015