सासू बणि छ न्युं च्युं, ब्वारि बणि थाणेदार,
काम कतै नि करदि वा, सुण्दि कुछ नि हपार....
मोबाईल वींकु नेट धारी, फेसबुक की रोगि बणि,
रात दिन झुकिं छ चैट फर, निंद नि औन्दि वी सणि....
रात भर वा सेन्दि निछ, दिन मा होयिं लमतम,
धाणि कू बोला चिरड़ेन्दि छ, गुस्सा औन्दु वी धम्म...
पैर्वाक सी पंजाबी बणि छ, करवाचौथ मनौन्दि छ,
गढ़वावाळि नि बोल्दि वा, हिन्दी मा छ्वीं लगौन्दि छ....
गौं का बण फुंड जब वा, घास काटण जान्दि छ,
भेळ ऐंच बैठिक वा, फेसबुक मा ख्वै जान्दि छ....
पहाड़ बांजा पड़िगि आज, हे कनु जमानु ऐगि,
यनि कळजुगि ब्वारियौं की कृपा सी, मोळ माटु ह्वैगि....
सासु बोन्नि छ हे नौना, यीं ब्वारि तू दगड़ा ल्हिजा,
भारी कळजुगि ब्वारि छ या, मैकु छुटकारु दीजा.......
20.10.2015
No comments:
Post a Comment