"बग्वाळ"

जै दिन बानि बानि का,
पकवान बण्दा छन,
वे दिन कु बोल्दा छन,
रे छोरों आज पड़िगी,
बल तुमारी "बग्वाळ"....

पर साल भर मा,
एक त्यौहार यनु औन्दु छ,
जै दिन की करदा छन,
सब्बि भै बन्ध जग्वाळ,
हमारा प्यारा मुल्क उत्तराखंड,
कुमाऊँ अर गढ़वाळ.

बग्वाळ का दिन खुश ह्वैक,
मनौन्दा छन,
हमारा मुल्क का मनखि बग्वाळि,
बणौन्दा छन दाळ की पकोड़ी,
अर मसूर की भरीं स्वाळि...

जग्वाळ मा रन्दि छ,
कैकि प्यारी ब्वे बाटु हेन्नि,
कब आला नौना, नौनि,
नजिक छ बग्वाळ,
हमारा कुमाऊँ अर गढ़वाळ.

रचना: जगमोहन सिंह जयाड़ा "जिज्ञासु"
(पहाड़ी फोरम, यंग उत्तराखंड और मेरा पहाड़ पर प्रकाशित)
ग्राम: बागी-नौसा, पट्टी. चन्द्रबदनी, टेहरी गढ़वाल.
दिल्ली प्रवास से...........२८.१०.२०१०
http://www.pahariforum.net/forum/index.php/topic,37.0.html