बग्त त्येरु आज ब्वारी .....

धौण टोटगि करि ब्वारी,

मोबैल चलौन्दि छ,

टी. बी. फर सीरियल द्येखि,

भारी खुश ह्वोन्दि छ। 

बौण फुंड जान्दि ब्वारी, 

मोबैल दगड़ा ल्हिजान्दि छ,

रिंगटोन बज्दि जब,

भारी खुश ह्वे जान्दि छ। 

बात कर्दि छक्कि ब्वारी,

सुद बुद ख्वे जान्दि छ,

मैत्यौं दगड़ि बात करि,

भारी खुश ह्वे जान्दि छ। 

धाण काज कन्न कू,

मनमौजी ह्वे जान्दि छ,

खाणौं बणौन्दि बग्त ब्वारी,

गीत गुण गुणान्दि छ। 

चिक्कन, ममोस अर चौमिन,

ज्यु भरिक खान्दि छ,

गेर भरे जान्दि जब,

फंसोरिक से जान्दि छ। 

सासू ससुरा जी कू ब्वारी,

मम्मी डैडी ब्वोल्दि छ,

जेठा जी कू भैजि भैजि,

भितर भैर डोळ्दि छ। 

मार्डन हिछ ब्वारी,

स्वचि थौ ह्वलि संस्कारी,

कुछ भी ब्वोलि नि सक्दा,

ह्वयिं छ अति लाचारी,

बग्त त्येरु आज ब्वारी। 

5/7/17