"ह्यून्द हमारा मुल्क"

होलि ठेणी लगणि,
हाथ खुट्टौं फर,
पड़्युं होलु ह्युं,
मसूरी,धनोल्टी,सुरकंडा,
सिद्धपीठ चन्द्रबदनी,
चन्द्रकूट पर्वत,
जख बिटि होलु दिखेणु,
उत्तराखंड हिमालय.

ह्यून्द होलि छयिं,
ह्यून डांडी-काँठी,
चाँदी सी चमकणी,
खतलिंग,चौखम्भा, नंदाघूंटी,
गंगोत्री, पंचाचूली, त्रिशूली,
होलि मैतुड़ा अयिं,
प्यारी दीदी-भुलि.

प्यारा ब्वे बाबु मू,
जू होला कौम्पणा,
ढिक्याण का पेट,
होलि खुद बिसरौणी,
छकिक छ्वीं लगौणी,
होलि बाड़ी अर फाणु,
अपणा हाथुन बणौणि
ऊँ तैं खलौणी.

रचना: जगमोहन सिंह जयाड़ा "जिज्ञासु"
दिनांक: ५.१.२०१०
(सर्वाधिकार सुरक्षित एवं प्रकाशित)
www.pahariforum.com